Despues di mas di 41 aña mi ta wordo forsa pa termina mi trabou di Dr. di Cas. AZV no kier extende mi contracto cu nan mas. Esey lo nifica cu 31 di augustus lo ta mi ultimo dia como dr. di cas.
Na prome instante nan a bisa cu nan a pensa (sin puntra) cu lo mi kier disfruta di mi pensioen, aunke dos aña pasa ma bisa cu mi kier sigui 5 aña mas, nan a bisa pa un aña so. Aña pasa nan a bolbe puntra, ma bisa nan cu mi kier sigui 4 aña mas, atrobe nan a bisa un aña so. E aña aki nan no a ni tuma contacto of puntra kico mi intencion lo ta. Nan ta bisa cu no tin luga mas pa mi sigiu traha. Den e mesun combersacion nan ta pidi si, si mi ta interesa pa traha den HOED na ImSan, kiermen e edad no lo ta motibo. I cu nan tin problema pa bezetting di e HOED cu suficiente dokter te casi final di 2025. Nan lo bai pense.
Den e siguiente reunion nan a keda para riba e punto cu mi no lo por sigui traha, y atrobe a puntra si mi lo ta interesa pa traha den HOED ImSan. Mi a bisa cu si ami no lo por sigui cu mi praktijk, mi tin un dokter cu ta traha basta aña na Aruba caba, y a traha varios biaha den mi praktijk ora di vakantie pa sigui cu mi praktijk. Esey nan no kier! E ora por lo menos e assistente di 20 aña largo lo keda, cu tambe tin hopi conocemento di e caracteristicanan di pashentanan pa facilita e cambio di dokter. Pa ami sigui traha den mi praktijk nan ta bisa mester baha cu pensioen, pero pa traha na HOED si por haya contract! Nan a bisa nan ta trahando riba e HOED pa dos aña caba! Tanten cu nan no tabata cla, si mi por a sigui, pero awor nan mester mi pashentanan pa yena e HOED! Pesey ami no por sigui y un otro dokter no mag di tuma over tampoco. Director di AZV ta nenga di reuni of sinta na mesa cumi.
Aparentemente AZV ta doño di e pashentnan y por dicidi asina. Porta huridacamente esey por ta berdad pero moralmente e no ta klop. Tur esaki sin avisa of overleg cu e dokternan concerni. AZV no tin e bienestar di su pashentnan como prioridad.
Dokternan di cas cu a haci e huisartsenopleiding di Aruba na Aruba, no mag tuma over y ta wordo obliga pa traha den HOED, y si no tin suficiente dokter ta busca dokternan di afor of duna dokter cu tin mas aña cu pensioen contract pa traha den HOED. Medisch esey lo por, pero dokter di cas ta mas cu esey so. Como dokter di cas bo ta cuminsa traha y sigui pa hopi aña pa siña conoce bo pashentnan, circumstancianan, familiares, aspectonan social etc. cu tur ta importante pa duna bon cuido.
Ademas tin problema cu e idioma, no ta tur hende por expresa nan mes bon den spaño, specialmente riba tereno priva y emocional pa expresa kico bo ta sinti. Aruba mester dokternan local cu lo establece nan mes pa tempo largo. Mi ta kere cu Aruba merece miho cuido cu e direccion cu AZV ta tuma awor.
Gobierno, specialmente Minister di Salubridad, mester ta na altura di esaki y ta permiti cu esey ta futuro medico di dokter di cas na Aruba. AZV, antes e orguyo di Aruba, ehemplar pa otro paisnan, mester a yega asina leu. Mastanto ta wak cu organisacionnan cu tin monopoliepositie tin tendencia di cambia cu caracteristica dictatorial, aunke na comienso HAVA a wordo garantisa door di e gerencia e tempo ey cu esey no lo pasa, y semper lo keda cu respet pa e zorgverleners cu na final ta keda e “backbone” di nos sistema medico cu tin na Aruba.
Miho manera pa gaña ta, pa papia berdad!
