Auto a sali dilanti brommer y motociclista a dal abou keda herida

Diasabra atardi riba caminda di Tanki Flip ta sosode un accidente entre auto y brommer, di biaha polisnan a keda dirigi n’e sitio. Ambulance tambe a keda mobilisa mes momento ya cu personanan n’e sitio a informa cu e motociclista ta herida.

Na yegada di polis a topa cu un volkswagen memei caminda y e brommer benta poco pabou. E homber a keda atendi di biaha pa paramedico y a stabilise n’e sitio y transporta pa hospital despues pa atencion medico.

Polis di trafico a tuma dato di e chauffeur unda e señora ta declara cu el a haya chens pa subi caminda di panort pa bay ariba, y e motociclista ta bahando di pariba pasando e autonan na banda robes. E motociclista a perde control slip y dal abou. E auto no lo tabatin daño ya cu e brommer no a dal den dje. Familiar a keda encarga cu e brommer.