Asamblea General di FUTURO a eligi y ta cla pa eleccion

FUTURO, e partido politico nobo mas prominente na Aruba, ta contento di anuncia cu a conclui su asamblea general cu e proposito di atende varios punto importante na caminda pa eleccion parlamentario 2024. Di e manera aki por medio di votacion, a scoge sra. mr. Gerlien Croes como e representante legal di e organisacion y tambe a formalisa instalacion di comisionnan oficial cu ta encarga cu e ehecucion di trabounan importante cu mester wordo haci pa e organisacion.
E decisionnan aki ta representa un stap importante den e desaroyo di e partido y ta un prueba cla di e compromiso di FUTURO cu democracia, proceso debido y e participacion activo di su miembronan. E eleccion a sigui segun e regla y statuutnan interno di e partido, sigurando asina transparencia y honestidad den su funcionamento.
“E asamblea general y decisionnan tuma ta marca un momento determinante pa FUTURO,” asina sra. mr. Gerlien Croes y sr. mr. Geoffrey Wever a expresa. “Nos a bini hunto pa nos vision comparti di un Aruba prospero e inclusivo, y nos ta honra di dirigi nos movemento dilanti cu e confiansa y sosten di nos miembronan.”
E votonan decisivo ta refleha e filosofia principal di FUTURO pa duna cada miembro su representacion den e tumamento di decision. Miembronan a asisti na e asamblea general, resaltando e dedicacion incondicional di e partido na crea un plataforma cu ta respeta e diferente perspectivanan y ta fomenta constantemente su pilarnan: Gobernacion efectivo, Transparencia, Union y Representacion.
Pa mas informacion riba partido FuTURo y su plataforma, por fabor bishita http://www.futuroaruba.com/ of tuma contacto na [email protected]