Aruba Conservation Foundation hunto cu partnernan local ScubbleBubbles Foundation, Universidad di Aruba y partner internacional Wageningen University & Research ta orguyoso di por lansa e documentario ‘Turning the Tide’ na Aruba. Filma durante un periodo di 16 luna, e documentario ta capta e proyecto piloto di restauracion di mondinan di mangel y rifnan di coral na Aruba hunto cu diferente expertonan local, regional, y international asina demonstrando e bunitesa di Aruba su naturalesa pero tambe e trabou compleho cu restauracion di naturalesa ta bin cune. E documentario lo ta disponibel pa wak cuminsando 31 di januari te cu 14 di februari na The Movies at Gloria IMAX, Renaissance, y Principal.
E documentario ta forma parti di e proyecto su obhetivo di crea concientisacion y educacion pa grandi y chikito, pa asina local y bishitantenan di afo compronde e rol importante cu naturalesa pa e ser humano y dicon mester proteha, preserva y restaura naturalesa. E anochi tawata atendi pa 278 persona incluyendo su Excelencia Gobernador Interino Vrolijk, su Excelencia Prome Minister Evelyna Wever Croes y su Excelencia Minister Ursell Arends. Tambe a bin Aruba pa presencia e documentario, Andrea Floudiotis y Karen Mahy di e Programa di RESEMBID y Rene Henkens y Ronald Osinga di Wageningen University & Research, hunto cu diferente boluntario, partners y demas invitadonan.
E proyecto piloto di Turning the Tide a inicia na januari 2023 y lo termina pa fin di februari 2025 y tin como meta e rehabilitacion di Aruba su rifnan di coral y mangelnan cu ta conecta ecologicamente den e ambiente marino. Desde inicio di e proyecto, ya caba a logra coba 3 silt traps pa gara sedimentacion – un na Rooi Taki, un na Rooi Bringamosa, y un na Rooi Lamunchi. Tambe na e momentonan aki ta cobando e canalnan na Spaans Lagoen pa asina drecha e fluho di awa. Adicionalmente, a logra instala 400 MARRS (Mars Assisted Reef Restoration Systems) y 13 MOSES (Modular Sealife System) den Parke Marino Aruba na Sero Colorado, Mangel Halto, y Oranjestad. E proyecto incluso e documentario a wordo completamente funda pe Union Europeo su Programa di RESEMBID, y tur e trabou y accion por wordo mira claramente den e documentario.
Aruba Conservation Foundation hunto cu ScubbleBubbles Foundation, Universidad di Aruba, y Wageningen University & Research kier extende un danki di curason na tur partners cu a yuda haci e proyecto piloto aki un exito. Y un danki ta bay na e mas di 210 boluntarionan cu a duna di nan tempo pa naturalesa di Aruba.
Un danki enorme tambe pa e team cu a traha incansabelmente pa trece e bunita storia di restauracion dilanti den forma di un documentario cu ta un produccion di Wings Global Media, filma pa producer y editor, Kanter Constandse, Executive Producer, Edeline Berg y Co-Producer y Graphic Designer, Ronaldinho Zara – ambos di Aruba Conservation Foundation. Musica a wordo composita pa Martin Buitenweg y nara completamente pa Rosabelle Illes. Un danki na tur persona cu a conta e storia di restauracion cu hopi pasion y amor den e documentario cu ta Natasha Silva – ACF, Rene Henkens – WUR, Sietske van der Wal, Giancarlo Nunes y Shane Thielman – ACF, Nichole Danser – ScubbleBubbles Foundation, y Tobia de Scisciolo – Universidad di Aruba.
E proyecto piloto por ta yegando su fin per e trabou di restauracion, sondeo, y monitoreo ta sigui.
Comunidad di Aruba completo ta keda cordialmente invita pa presencia e documentario di ‘Turning the Tide’ pa asina siña y conecta mas cu e naturalesa di Aruba.
Pa mas Information, por tuma contacto cu [email protected]
Source link
