ARUBA TA FORTIFICA SIGURIDAD CIBERNETICO DEN SECTOR DI AVIACION

1

Ministerio di Transporte, Integridad, Naturalesa y Asuntonan di Adulto Mayor a tuma un paso importante pa proteha sector di aviacion civil di Aruba contra menasa cibernetico. A crea un werkgroep pa desaroya un Strategia di Siguridad Cibernetico specificamente pa Aviacion, cu ta sigui e standardnan internacional di International Civil Aviation Organization (ICAO).

Cu un dependencia cada bes mas grandi riba sistema di informacion y comunicacion, ta esencial pa proteha e integridad y confidencialidad di dato den e sector di aviacion. Minister Ursell Arends ta remarca cu pa mantene siguridad y continuidad den aviacion civil, Aruba mester tin un strategia fuerte pa combati menasa cibernetico.

E werkgroep tin como meta:

• Desaroya un Strategia Nacional di Seguridad Cibernetico specificamente pa aviacion civil di Aruba, segun e regla di ICAO Annex 17 y e guia den documentonan concerni di ICAO.
• Evalua e medidanan di siguridad existente y detecta discrepancia of riesgo den e sistema actual.
• Formula recomendacion pa maneho cu ta alinea cu e Beijing Convention y otro acuerdonan internacional cu ta relevante.

E werkgroep lo asegura pa e trabou ta alinea cu Aruba su strategia nacional como tambe strategia di ICAO pa cu e tema di siguridad cibernetico. E werkgroep ta consisti di diferente departamentonan importante cu experticio den aviacion y e tema di siguridad Cibernetico. E grupo tambe por yama riba experto for di otro instancia pa duna conseho y guia adicional. E grupo lo tene reunionnan mensual y lo entrega un rapport di progreso cada tres luna na e Minister encarga. E plan final mester ta cla pa 31 di december 2025.

“Siguridad cibernetico den aviacion ta un asunto di siguridad nacional y pa proteha e pasahero y infrastructura critico, mester bin cu e strategia aki. Aruba ta tuma paso firme pa enfrenta menasa cibernetico y proteha nos espacio aereo,” Minister Arends ta enfatisa.

Gobierno di Aruba ta compromete pa sigui e standardnan internacional y fortifica siguridad pa mantene Aruba como un destinacion sigur y confiabel.