Aruba Bank ta honra Mariela Erasmus pa su 45 aña di servicio

1

E ta cla pa disfruta di su pension bon mereci

Oranjestad – 07 di februari 2025 – Despues di 45 aña di servicio ehemplar, Aruba Bank ta honra y despedi cu orguyo di Mariela Erasmus, cu ta cuminsa cu su pension bon mereci. Durante su carera, Mariela a demonstra un dedicacion sin igual, profesionalismo y gracia, lagando un impacto profundo riba su coleganan, clientenan, y e organisacion den su totalidad.

E trayectoria di Mariela na Aruba Bank ta wordo defini pa su etica di trabou excelente, pasenshi y perseverancia. Su bondad y presencia tabata uno di admiro durante dianan di trabou, ganando e respet y admiracion di tur esnan cu a traha hunto cu ne. Su contribucion a yuda forma e cultura di excelencia cu Aruba Bank ta representa awendia.

Mientras Mariela ta drenta e capitulo nobo di su bida, Aruba Bank ta expresa su gratitud profundo pa tur a añanan di trabou compromiso. Nos ta desea Mariela un retiro bon mereci yena di felicidad, bon salud y momento balioso cu famianan.