Aruba Bank ta contribui na enseñansa digital di Colegio San Hose cu un “digital screen” nobo

2

Oranjestad – 26 di september 2024 – Recientemente Aruba Bank a contribui cu un “digital screen” nobo pa Colegio San Hose, un paso significativo pa mehora e ambiente di enseñansa digital di e scol. Como un di e scolnan na Aruba cu a implementa Papiamento completamente como idioma principal, Colegio San Hose a tuma un paso pionero den desaroyo di materialnan di enseñansa digital cu ta refleha nos cultura y idioma local.

Colegio San Hose a transforma su curriculum pa crea un gran cantidad di material digital den Papiamento. E uzo di screen digital ta sigura cu studiante nan tin acceso na contenido mas relaciona cu nan realidad y culturalmente relevante, diseña specificamente pa nan necesidadnan.

Cu sosten di Aruba Bank, e scol ta awor ekipa cu un “digital screen”. Esaki lo permiti cu e maestronan por duna lesnan mas interactivo y atractivo, preparando e studiantenan cu naturalmente ta prefera enseñansa digital pa eksito den un mundo cu ta cambia rapidamente.

Colegio San Hose ta contento di por a cuminsa e aña escolar nobo cu mas recurso digital, danki na e sosten di Aruba Bank. E patrocinio aki lo permiti e studiante nan pa saca probecho di un ambiente di enseñansa dinamico cu ta comparti directamente cu nan preferencianan digital, mientras ta promove nos idioma y cultura local.