Aruba Airport Authority N.V. (AAA) conhuntamente cu Aruba Conservation Foundation (ACF), ta orguyoso di anuncia e firmamento oficial di un Memorandum of Understanding (MoU) entre e dos organisacionnan basa riba un compromiso di cinco aña 2026-2030, cu e meta pa ecologicamente restaura partinan di e area protehi di Ser’i Teishi uzando vegetacion nativo, aumentando di e manera aki e diversidad natural di especienan nativo di palo y tambe e biodiversidad di fauna asocia, manera polinisadornan.
Den liña cu e vision di AAA, metanan di sostenibilidad y su Environmental Management System Pillar 5 – Maneho di Biodiversidad, lo inverti e fondonan aloca den e planificacion, trabounan di preparacion y ehecucion di e restauracion di e area protehi Ser’i Teishi den diferente fase enfoca riba mehoracion di biodiversidad guia pa e areanan protehi a largo plaso door di ACF su plan a largo plaso Protected Area Conservation Management Framework y e prioridadnan di maneho pa e areanan protehi riba tera.
Durante e ultimo añanan, AAA y ACF a traha di cerca riba un cantidad di iniciativa impactante di conservacion. Esakinan ta inclui e lansamento di e programa Flora Biodiversity Enhancement Program di ACF na Parke Nacional Arikok den colaboracion cu Cultuurfonds Caribisch Gebied, cu ta ofrece un ‘greenhouse’ cu ta acapara mas cu 70 especie di mata nativo como parti di e esfuersonan di restauracion di habitat.. AAA tambe a colabora riba e reintroduccion di e Yellow-shouldered Amazon localmente conoci como Lora a traves di sosten pa construccion di un ‘flight aviary’. E esfuersonan conhunto aki ta refleha un compromiso comparti pa salvaguardia e naturalesa di Aruba y ta subraya e compromiso di AAA pa brasa su responsabilidad ambiental dentro di su operacionnan di aeropuerto y den su rol como partner pa e comunidad local. Pa medio di e colaboracionnan aki, AAA ta sigui contribui strategicamente pa proteha e medio ambiente natural, mientras ta involucra y curasha miho practicanan sostenibel bou di e empleadonan di AAA y comunidad en general.
Tocante Aeropuerto di Aruba
AUA Airport ta un di e aeropuertonan mas ocupa den region Caribe, cu mas di 24 diferente aerolinea operando na Aruba contribuyendo na mas cu 3.2 miyon pasahero pa aña y brindando servicio aereo na 31 pais y 45 destinacion non-stop rond mundo. Di e mercadonan cu AUA Airport ta brinda servicio na dje, 73% ta di Merca y Canada, 18% ta di Latino America, 4% ta di Europa y 5% ta di Caribe Hulandes. AUA Airport ta reconoce cu esaki ta danki na un economia stabiel, clima politico, hospitalidad, populacion diversifica y siguridad general di nos isla. AUA Airport su aspiracion ta pa converti den un di e aeropuertonan mas sostenibel, sigur y prepara pa futuro den e region di Latino America y Caribe, brindando un espacio laboral confiabel, cu e instalacionnan moderno y ademas cu un excelente servicio n’e cliente p’asina por refleha e hospitalidad di Aruba, contribuyendo na un futuro prospero pa Aruba.
Haya sa mas di loke ta sosode na AUA Airport door di bishita www.airportaruba.com y conecta cu AUA Airport riba Twitter.com/Aruba_Airport, Facebook.com/ArubaAirport, Instagram.com/arubaairport, TikTok.com/@arubaairport y Linkedin.com/ArubaAirport.
Source link
