“Clarividente”(Afterlight) 2024 ta un art performance a ser presenta dor di artista multidisciplinario Alydia Wever oficialmente ariba diadomingo 24 di november 2024 pa e finissage di e exposicion di arte internacional di European Cultural Center di Italia na Venezia, titula “Personal Structures, Beyond Boundaries” na Palazzo Mora pa cierre di e 60 Biennale di Venezia na Italia, titula “Foreigners Everywhere”. E art performance aki ta parti di e video art cu ta un colaboracion conhuntamente cu artista Ryan Oduber cu a filma, saca potret y a edit e video aki. Tambe “Clarividente” video art a ser selecciona for di un cantidad grandi di diferente video nan impresionante conhuntamente cu 14 otro video art y tambe como un di e 28 artista nan internacional invita pa e presentacion oficial di e festival cu a nace na Venezuela 20 aña pasa dirigi pa artista/museologo andreina Fuentes Angarita, Presidente di Arts Connection Foundation, tambe coordinacion general ta bao di encargo di museologo y historiadora di arte Milagros González.
Pa e di 20 aniversario di Miami New Media Festival di 2024 “Clarividente” como un di e seleccion oficial, tambe e video arte aki ta ser exhibi banda di un lista increibel di obra nan di arte di artista nan talentoso den e exhibicion titula “”Fin del Cuento ( End of Story)”” y tabata tin su apertura ariba diasabra 12 di october 2024, na Arts Connection Foundation Gallery, 676 NW 23 St, Miami FL 33127 na Merca.
Un exhibicion cu a cuminsa su gira internacional y a ser presenta caba na Venezuela na e ciudad di Barquisimeto na estado Lara na Barquisimeto Golf Club/ Espacio- Galería “Félix Otamendi Osorio” bao di produccion di Curador Al Vanegas cu despues a sigui pa e ciudad di Mérida, estado di Mérida y a ser ricibi na e “Espacio Proyecto Libertad bao di produccion di e Curadora Elizabeth Marín de Hernández, despues e festival a translate pa e ciudad di San
Cristóbal, di estado di Táchira y sigur a ser bon ricibi na “Fundación Cultural Bordes/ Galería-Café Bordes” bao di Curadora Fania Castillo. Ariba diadomingo 17 di november e exhibicion aki a habri na ciudad di Maracaibo na estado Zulia y a ser ricibi na “El Anter vol 3” cu ta un evento produci pa Coolto Agency y productor Alejandro Calmen. Miami New Media Festival lo continua su gira internacional otro aña na 2025, y lo culmina den Caribe reafirmando su impacto internacional.
E gira internacional ta bao produccion general di Jimmy Yánez, representante di Miami New Media Festival para el Caribe continental e insular.
Saya cu djeki su descripción y simbolismoE vestuario folklorico tipico di Aruba ta yama “Saya cu djeki” na Papiamento. E nomber ta referi na e combinacion tradicional di un saya y un djeki ku tabata ser uza hopi na Aruba durante tempo nan colonial. E vestuario aki a bira un aspecto distintivo di e cultura di e isla y tabata influencia pa un mescla di tradicion nan di bistimento Europeo, Africano y indigena. Durante e periodo colonial, paña tabata simbolisa status social y identidad. Saya cu djeki tabata un manera pa Arubiano nan local adapta na e influencia nan colonial sin perde nan sentido di autonomia cultural.
E vestuario di e tela di catuna blanco tabata worde bisti dor di e hende muher nan. Esaki ta consisti di un saya modesto combina cu un jacket. Ambos tabata practico pa e clima tropical di Aruba. Un estilo cu tabata refleha modestidad, un caracteristica hopi importante durante e epoca aki. Pero saya cu djeki tabata mas cu solamente paña; e tabata un expresion di adaptacion y resiliencia. Mientras cu e colonista nan a introduci e estilo Europeo, e hende local a incorpora diferente elemento cu ta combina miho cu nan medio ambiente y identidad cultural. E resultado? Un mezcla unico di moda cu a representa tanto resistencia na dominacion colonial como e fusion cultural cu a nace durante e periodo di tempo.
Awendia saya cu djeki diferente biaha ta worde bisti durante celebracion nan cultural, recreacion y evento nan historico, simbolisando e forsa y historia di dominio di Aruba y su herencia cultural.
E bisti di “Clarividente” ta traha di catuna, kantji y tambe tela di tipo “saco” of canvas. E ta refleja e awa blauw rond di e isla y mey mey di e diferente screen print nan. Na e rand abou di e saya bo ta hanja e falchi di kantji, cu hilo di pisca fini y un calbas chikito mara na esaki. Ariba e screen print nan tin diferente elemento nan di e flor y fauna di e isla, tambe nomber di diferente hotel y negoshi nan turistico cu for di mas cu 40 aña pasa a establece nan mes ariba e isla. Hopi di e hotel nan a cambia di doño y nomber of diferente di negoshi nan aki no ta existi mas. E diferente screen print nan aki a wordo haya diesdos aña pasa, dobla den diferente caha nan di carton, bou di stof, tera, cacalaca y raton, abandona den un espacio (warehouse) cu antes nan tabata yama Artesania durante fin di aña nan 70 y 80. Un espacio unda cu antes les, workshops nan di diferente docente nan di arte y artesania a jega di duna les ey nan. Tambe sigur e tempo ey arte y artesano nan local di e isla Aruba tabata bende nan producto nan traha na man. E delantera (schort) manera nos ta jame na Papiamento, durante e tempo di
exclavitud y tempo colonial hopi biaha tabata simbolisa sumision y sirbimento. Den hopi sociedad colonial, particularmente den e sector di plantacion, caminda esclavitud tabata prevalese, e delantera tabata un parti comun di e uniform cu tabata ser bisti. Particularmente e hende muher nan cu tabata traha como sirbido di cas. E tabata nifica nan rol como cuidado, limpiado y cushinero, rol nan cu nan doño nan, for di e tempo di exclavitud a impone ariba nan.
Den e contexto aki, e delantero a bira un simbolo poderoso di opresion, representando e trabou obligatorio, e deshumanizacion, y e rol nan di genero cu a wordo aplica bou di exclavitud y colonialismo. E hende muher nan esclavisa, especialmente den cas, hopi biaha tabata mester bisti paña como parti di nan bistimento diario, marca nan como “den servicio” y reforsa nan status di subordinacion den e hierarcia colonial. Na e mes momento, den cierto analisis historico cultural, e mes un delantero aki a ser reinterpreta como un simbolo di resiliensia y supervivencia. Apesar di su asociacion cu opresion, e ta representa tambe e forsa y agencia di esun nan cu a soporta y a navega e complexidad nan di dominio colonial, hopi biaha buscando manera pa mantene nan dignidad y cultura den cara di explotacion sistematico.
Na e rand di e material di kantji tin 35 Calbas (Crescentia cujete) mara cu hilo di pisca fini. Un mata asombroso ku durante milenio nan a ser considera un palo di mata sagrado pa hopi sociedad cultural di Amerindia. E ta floria anochi y ta ser polina principalmente dor di raton di anochi. Su simia a keda distribui den henter e area tropical dor di nomado nan, presumiblemente diferente cazador y recolector nan, y su proliferashon a sigui durante e tempo colonial pa su practicidad, forma interesante, y resistencia reutilizabel.
Pero e palo di mata sagrado aki, tambe a sufri discriminacion ultimamente dor di esnan cu ta considere algo ku ta pertenese na e pober nan y na e pasado, pesei cu nan ta kibre of kite for di caminda sin ningun consideracion. E cuminda paden di e calbas ta hunga un papel importante, si no central, den bida y mitologia di Aruba y Mesoamerica, unda historia y sociedad nan relaciona cu e parti di e planta aki, a atribui na su durabilidad general y hopi aplicacion practico, hasta medicinal. Durante miles di aña, e calbas tabata sumamente di balor como un recipiente biologico practico y reusabel den diferente forma y tambe como un instrumento musical of ser husa den ritual y ceremonia nan.
Pakiko a scoge Venezia pa presenta e art performance “Clarividente”? Pasobra Venezia ta e pais numero uno den Europa pa cu e exceso di turismo, cu ta un reflexion paralelo ariba exceso di turismo tanto pa Aruba como Venezia. Esaki ta funciona como un critica interseccional di consumismo globalisa y colonisacion di espacio. Tanto pa Aruba como pa Venezia e performance esaki ta un exploracion di e tension entre preservacion y explotacion, caminda e dos isla nan, tanto literal como metaforico, ta keda despoja di nan agencia cultural den e wowo di e turista.
E intercambio cultural aki a ofrece un interaccion unico caminda e publico a bira tanto participante como testigo, directamente interactua ku e tema di e obra.
Esaki ta un metodo immersivo cu lo hasi e critica mas personal, transformando esnan ku ta mira den agente activo di e experiencia. Un danki tambe ta bai na Señor Diego Fernanado Giraldo cu a diseña y confecciona esaki.
Miami New Media Festival den e contexto di Biennale di Venezia
European Cultural Center di Italia na Venezia a invita Miami New Media Festival pa celebra grandemente su aniversario di 20 aña di existencia pa den e contexto di e 60 International Art Exhibition di La Biennale di Venezia. Aki a ser presenta un seleccion di video art di artista nan sobresaliente cu ta parti di e biahe historico di e Festival aki. Miami New Media Festival tabata tin tres loop ku 9-10 video/loop como parti di e exposicion di “Personal Structures” Beyond Boundaries for di diarason 20 di april te ku diadomingo 24 di november 2024, na Palazzo Bembo (sala G).
Alydia Wever y Ryan Oduber artistanan
Den e di dos loop, for di diasabra 21 di juni te cu dialuna 30 di september 2024, e video-art titula “E La Guli Su Lenga” 2020 a ser selecciona y presenta. E video art aki ta parti di e solo exposicion “Mi No Tin Palabra” presenta pa artista Alydia Wever na Stichting Rancho na Visstraat 1, na fin di July di 2021 como parti di e celebracion di 200 di Oranjestad Aruba.
Den luna di april di 2024 ariba diabierna 26, diasabra 27 y diadomingo 28 na WGKunst na Amsterdam Hulanda, tabata tin e presentacion di e exhibicion di Miami New Media Festival su 20 aniversario titula “REPAIR”. Aki un grupo di artista internacional a ser selecciona dor di curador y artista Hugo Palmar for di e opencall y tambe diferente artista nan a ser invita pa presenta nan obra di video art. “Dilanti di Biento” 2023 di artista nan Alydia Wever y Ryan Oduber a ser invita como parti di e grupo di exhibicion y ariba diadomingo 28 di april na e localidad di e exhibicion WGKunst tabata tin e artist talk, unda cu conhuntamente cu diferente otro artista nan cu tambe a presenta nan video art, a comparti esaki cu e publico presente na e atardi di informacion artistico aki. Tabata tin artista nan cu a conecta online y cada un presente a splica nan concepto, idea nan, y con e proposicion di cada un di nan lo a tuma lugar cu e tema y e uso di medio nan nobo como un recurso expresivo. Kico ta reparacion? Con bo ta conecta esaki ku bo proposicion?
Artista Alydia Wever y Ryan Oduber a expresa nan gratitud inmensamente especialmente na artista/museólogo Andreina Fuentes Angarita, coordinacion y curador nan di Miami New Media Festival, tambe hopi contento y sigur inmensamente agradeci na organisador Srta. Sara Danieli y directora di arte di European Cultural Center di Italia na Venezia, na WGKunst/ Hugo Palmar na Amsterdam, Jimmy Yánez, Representante di Miami New Media Festival pa Caribe Continental y Insular, y Mondriaan Fonds pa nan continuo sosten y ayudo grandemente. Sin lubida famia, amigo y conoci nan cu semper ta presente unda cu e duo artista Arubnan aki presenta.
