E ekipo Almas Libres Kickingball a celebra un victoria historico ora nan a bira campeon den e prestigioso torneo internacional di
kickingball realisa na Corsou. Esaki ta un refleho di nan esfuerso, dedicacion y espirito competitivo, cu ta caracterisa e talentoso ekipo
aki cu a pone e nomber di Aruba un biaha mas na halto.
Ademas di e titulo di campeon, a premia cuater hungado di ekipo pa nan actuacion sobresaliente den e torneo:
• MVP (Miho Hungado di e Torneo) y Best Pitcher: Reconoci pa su liderato, precision y su esfuerso integral como pitcher Norkis
Botini
• Best Short Field: Premia pa su abilidad defensivo y agilidad den e tereno. Fabiola Vázquez
• Best First Base: Honra pa su actuacion impecabel y siguridad na primera base Evelyannis Vargas
• Best Left Field: reconoci pa su excelente cobertura y determinacion den e zona banda robes Maria Alejandra Arancibe
E ekipo ta gradici inmensamente tur esnan cu a brinda nan apoyo manera INGTEC, Julio’s Corner y Marcano Automotive Solutions. Sin nan apoyo y
confiansa, esaki no tabata posibel. Danki pa kere den e talento y potencial di kickingball na Aruba.
Den e contexto aki, Almas Libres Kickingball kier inspira otro ekiponan deportivo riba e isla pa reintegra, sigui disciplina y sigui
cultiva e amor pa e deporte aki. Ta esencial cu kickingball wordo balora na nos isla manera un deporte di igual importancia cu otro
disciplina deportivo. Almas Libres libre ta compromete pa traha duro pa garantisa balance, desaroyo y crecemento di e deporte aki.
Ta haci un yamada na tur hungado cu ta practica kickingball na Aruba pa uni cu nan iniciativa. E meta ta forma e miho ekipo posibel pa
representa nos isla den e proximo campeonato internacional, elevando e nivel di kickingball local.
ALmas Libres ta invita empresanan grandi y chikito como entidadnan gubernamental, pa duna sosten na e disciplina deportivo aki. Deporte
no ta solamente pa salud fisico, pero tambe pa promove balornan fundamental manera disciplina, union y respet.
Pabien na Almas Libres Kickingball y nan hungadonan premia. Cu e victoria aki ta e inicio di hopi mas exito pa kickingball na Aruba.
“Hunto nos por logra cosnan grandi!”
Kickingball ta un wega parecido na baseball of softball, pero ta scop e bala en bes di bat esaki. E reglanan ta un poco diferente di loke ta
permisibel pero e meta final ta esun cu anota mas careda ta gana.
