AHATA ta contribui na oportunidad pa mas alumno completa nan educacion na Colegio EPI

Aruba Hotel & Tourism Association (AHATA) ta reconoce e importancia di Colegio EPI como scol cu ta ofrece preparacion pa e siguiente generacion di profesionalnan den nos mercado laboral. Acceso na educacion ta yuda nos hobennan alcansa nan aspiracion academico y un carera. Sinembargo, tin varios caso unda hobennan no tin e posibilidad financiero pa por completa nan educacion. Pa yuda cu solucion, AHATA a contribui AFL 25.000 na e fondo social nobo “Sociale Fonds Colegio EPI”.
Danki na e sosten di 160 miembro di AHATA, e asociacion representante di dunador di trabao por yuda desaroya un forsa laboral fuerte cu e donacion significante.
E donacion a ser presenta pa Tisa LaSorte, Presidente y CEO di AHATA na Andres Geerman, Presidente di SFCE, Randy Sandriman, Tesorero di SFCE, y Ankie Danker, Directora General di Colegio EPI.
E fondo social ta asisti alumnonan enfrentando limitacion financiero cu e sosten necesario pa nan por obtene nan diploma di Colegio EPI. E donacion di AHATA ta apoya e meta aki y lo yuda mehora acceso na educacion, asina dunando mas studiante e oportunidad pa caba scol. E asociacion ta contento cu e donacion lo brinda mas oportunidad pa studiantenan cultiva nan potencial y talento, y ta comprometi na sigui aporta na un educacion mas accesibel y un forsa laboral bon prepara.